«Котырес ӝӧк» сьӧрын лэчыт юанъёс

20 южтолэзе Тодосчиослэн юртазы ортчизы «котырес ӝӧк», кудиз вал сӥземын удмурт движенилэн 100 ар тырмемезлы. Кенешонлэн валтӥсь ужпумез - удмурт движенилэсь азинскон луонлыкъёссэ эскерыны. «Ми люкаськимы шуг-секытъёсты быдтон бордын ужаны. - пусъе Василий Михайлович Ванюшев -Тужгес но туала вакытэ валтӥсь ужпум – удмурт кылэз утён. Н.Н.Мусалимов тырмымон адӟытӥз ини, кыче улӥе ми усьыми ни шуыса. Кин пуке асьме исполкомын? Удыс тӧроос! Соос кылзо-а калыклэсь верамзэ? Уг, уг но тыршо. Удмурт кыл но лулчеберет понна сюлмаськысалзы ке, таӵе югдуре ми ӧй вуысалмы». Петр Петрович Бобров будэтӥз: «Калык кошке Кенешысь, ужмы сылэ, со уг азьланьтӥськы, берлань кошке шуыны луоз. Вань ужъёс борды выльысен кутсконо»

«Котырес ӝӧке» люкаськемъёслэн малпанзыя, Удмурт Кенешлэн Уставаз кулэ пыртыны воштӥськонъёс – тӧро медаз быгаты политика ужъёсы пыриськыны. «Инициативной огазеяськонъёсты кылдытыку инлыксы вал «мерлыко», нош зэмзэ ке луиз «политик» - пӧсекъя Викторов Илья Михайлович.
Озьы ик ортчизы тэкшеронъёс Венгриысь Калыккуспо Финн-Угор конгресэ мынӥсь муртъёс пумисен. Удмурт калык пӧлысь 20 адямиез быръёно. Вал кутэмын пуктэс, кин мыноз конгресэ: 4 - тодосчи, 2 - мерлыко огазеяськисьлэн езчиез, 3 - егитъёсыз, 5 - ёросъёсысь муртъёс, 1 - кунгож сьорысь удмуртэз, 1- элькун сьорысь удмуртэз. Алексей Шкляев ялӥз люкаськемъёслы, кызьы быръе ас делигацизэ Коми калык, кыче выльдонъёс соос пырто.
Вал эскеремын ужпумъёс Трокай Борисов ужъя, но удмурт кылэз утен пумысен. Удмурт кыллэн туала инэтэз тужгес но зол кӧтшугъяськытэ: «Туннэ нуналлы туж секыт учыре сюремын удмурт кыл: егитъёс ӟучомо, школаосын тросаз удмурт кылэз уг дышето… Синйылтэ ай, асьме Ижкарын нимпулъёс ӟуч кылын гожъямын, котыр ваньмыз ӟуч. Бигеръёсын ке ӵошатоно – соослэн ваньмыз анай кылын гожъямын. Милемлы вань мае соослэсь адзем карыны.» - пусъиз Николай Алексеевич Суворов.
«Таӵе пумиськылонъёс табере ӵемгес ортчылозы» - оскытӥзы люкаськемъёс.